Тыл ветераннары бәйрәм котлаулары алды

Тукай районының Мәләкәс авыл җирлегендә барлыгы алты тыл хезмәтчәне яши: Евдокия Мамонтова, Анна Павлова, Евдокия Пантелеева, Матрена Степанова, Евдокия Трофимова, Екатерина Трофимова.
“Без, Мәләкәс авыл җирлеге башлыгы Юрий Васильев, китапханәче Лидия Фартдинова, мәдәният йортының сәнгать җитәкчесе Марина Казанцева, ветераннар советы җитәкчесе Михаил Калинин, Тукай районы башлыгы Фаил Камаев исеменнән һәм үзебездән ветераннарга котлау открыткалары һәм бәйрәм күчтәнәчләре тапшырдык. Аларга озын гомер һәм илебезгә тынычлык теләдек. Авыр чорның ачы газапларын татыган өлкәннәребез мондый кадер-хөрмәткә чиксез куанды, күз яшьләре аша рәхмәтләрен ирештерделәр”, – дип хәбәр итте Марина Казанцева.