Питрау Түгәрәк уены

Күрше авыллардан бик күп кунак кызлар, егетләр, уган-тумачалар киләләр. Кызлар әбиләрдән һәм әниләрдән калган тәңкәле киемнәр кияләр. Түгәрәк уенда егетләр кунак кызларны биергә чакырсалар, болай дип җырлаганнар:

Менә җитте питраулар

Кунак кызлар аласыз.

Кунак кызлары киткәчтен,

Барыбер монда каласыз.

Түгәрәк уенда берәү уртага чыга да җыр башлап җибәрә. Аның буладырые такмаклысы, биеп әйтә торганы. “Уен киче” дип көтеп торадыр идек. Элекке өч көнгә бар иде уеннар.

“Питрау уены” дип култыклашып та, түгәрәкләшеп тә уйнарлар иде:

Безнең Җүкәче урамы

Себермәсәң дә матур.

Безнең авылның яшьләре

Читкә китсә дә кайтыр.

Без утырткан гөлләрнең

Тамырын корытмагыз.

Без гомергә тормабыз,

Безне дә онытмагыз.

Питрау көнне авылда иң зур, иң матур түгәрәк уен уйналган. Питраудан соң инде түгәрәк уенга чыгу  тукталган, чөнки хәзер авыл тормышындагы хуҗалык эшләре: “печән өсте”, аның артыннан “урак өсте” ялганып китә.

Ф.С. Баязитова,

Филология фәннәре докторы.