Кукмара районы башлыгы Сергей Димитриев: «Качмануда су коенып, ел буена җитәрлек энергия алам» (видео)

Бәйрәмгә район башлыгы Сергей Димитриев та килде. Ул күпләгән карендәшләребез белән бер рәттән, аруландырылган суга керде. Аның белән журналистыбыз Олеся Дмитриева аралашып алды.

Мин 12нче ел рәттән йолага тугры калып, Качмануда су коенам. 19, 20, 21 көннәре – елга өч тапкыр керергә тырышам. Башкаларга да киңәш итәм. Качмануда су коенып, ел буена җитәрек энергия алам. Кемдер “авырыйм” дип әйтә бит. Менә ничә ел керәм суга, бер тапкыр суык тигәне дә юк. Киресенчә, бу миңа көч бирә, рух бирә.

Иң беренче итеп Село-Чурадагы купельдә керәм. Районыбызда барлыгы биш урында коенып була. Шуларның икесе – боз өстендә, өчесе – махсус эшләнелгән урыннарда. Күрше районнардан, авыллардан да күпләп йөриләр. Барлык куркынычсызлык чаралары каралган, елдан-ел шартларны яхшыртырга тырышабыз”, – дип сөйләде ул.

Село-Чурадагы Качману бәйрәменнән тулы репортажны тиздән газетабыз битләрендә һәм социаль челтәрләреннән укый алырсыз.

Видео: Олеся Дмитриева