“Усыкай буйлары” да игътибар үзәгендә булды

Алар үз халык җырулары белән беррәттән, керәшеннәрнең элекке һәм хәзерге көнкүрешен чагылдырган бай күргәзмә һәм милли ризык тулы табын да әзерләгәннәр иде. Табында – кыстыбый, тәбә, манылган күкәй, кузгалак һәм алма пируглары да урын алды. Авыл мәдәният йорты директоры Миләүшә Филиппова җитәкчелегендәге “Усыкай буйлары”ның милли керәшен киемле кызлары чыгышы, һәрвакыттагыча, бәйрәмгә килүчеләрнең кәефен тагын да күтәрде. Алар әле бәйрәм барышында татар, рус, мари һәм керәшеннәрнең сый тулы өстәлләрен карап йөргән Татарстан Дәүләт советы председателе Фәрит Мөхәммәтшинны уртага алып, фотога төшү җаен да таптылар.

Фәрит Мөхәммәтшин район балалар сәнгать мәктәбендә булды, аз тәэмин ителгән гаиләләрдәге балалардан беренче класска баручыларына укучы сумкасы тапшырды. Бу көнне Мөслимдә “түгәрәк өстәл”ләр, семниарлар, тренинг та уздырылды.

Фәрит Мөхәммәтшин республиканың иҗтимагый тормышында актив катнашканнары һәм аның социаль-икътисад үсешенә үзләреннән лаеклы өлеш керткәннәре өчен, Мөслимнең дус-тату халкына рәхмәт белдерде.