Светлана Матвеева: “Киләсе бәйрәмнәргә ныклы әзерлек бара”

Бу авылда язгы өмәләр матур традициягә әйләнгән. Авыл җирлеге җитәкчелеге тарафыннан оештырылган өмәдә олысы да, кечесе дә катнаша. Чүп-чар җыештыру белән генә чикләнмиләр – авыл урамнарындагы электр баганаларын агарталар, юл буйларын тәртипкә китерәләр. Зиратта да өмә уздырып, чисталыкта тоталар.

Бу эшләрдән тыш, авыл халкы якынлашып килүче бик зур бәйрәмгә – Җиңү бәйрәменә дә җиң сызганып әзерләнә. Шулай ук, һәйкәл янын җыештыралар, Бөек Ватан сугышында һәлак булган авылдашларының һәйкәлгә уелган исем-фамилияләре буявын өр-яңадан язалар. 9 Майда һәйкәл янында мәктәп укучылары катнашында Җиңү бәйрәме уздырыла. Ул көнне һәйкәл янына барлык авылдашлар да килә.

“Җиңү бәйрәмендә авыл мәктәбе балалары ел саен чыгыш ясыйлар. Патриотик җырлар һәм шигырьләр тыңлап, бөтен кеше солдат боткасынан авыз итә”, – дип сөйләде Кайбыч муниципаль районының Хуҗа Хәсән авыл җирлеге башлыгы Светлана Матвеева.

Алинә Галимҗанова.