Сарсаз-Багражда өмәгә чыкканнар

Зәй районы Сарсаз-Баграж авылының Яңа урамында яшәүче хатын-кызлар җыелышып, авылдагы күпер буен, күпердән олы юлга чыгучы юл буендагы чүпләрне җыйдылар. Бу турыда "Зәй офыклары" хәбәр итә.

Апрель – май айларында тирә-юньне чистарту, тәртипкә китерү икеайлыгы тикмәгә генә игълан ителми. Чөнки яз җитү белән кыш буе кар астында күренми яткан чүп-чар баш калкыта. Узган елгы корыган үләннәр арасыннан беренче чәчәкләр урынына пыяла шешәләр, сигарет каплары күренә башлый, ә алар янында күбәләк сыман төрле кәгазь кисәкләре очып йөри.

Сарсаз-Баграж авылының Яңа урамында яшәүче хатын-кызлар җыелышып, авылдагы күпер буен, күпердән олы юлга чыгучы юл буендагы чүпләрне җыйдылар. "Өмәгә чыгу бер дә кыен түгел, һава торышы да уңай тора. Рәхәтләнеп эшләдек", – ди алар.

Авыл җирлеге башлыгы Павел Минеев әлеге изге эшкә алынучыларга рәхмәтле. "Чисталык, матурлык үзебезнең өчен бит, бу эшкә башкалар да кушылсын, авылны чүптән чистартуга үз өлешләрен кертсен иде", – ди ул.

Фото авыл җирлегеннән.