Людмила Гатауллина: "Сольный концертыма әзерләнеп йөрим"

- Ару гына торабыз. Шушы көннәрдә генә Зәй шәһәрендә Виталий Агаповның "Керәшеннәр җырыу әйтә" фестивалендә "Айбагыр" ансамбле белән катнашып кайттык. Үзем анда керәшен җыруларына попурри башкардым. Зәйдә бит мин бераз эшләп киткән идем. Рәхмәт, тамашачы бик җылы каршы алды. Үземнең дә күңелләр тулды. Менә шулай бер дә тик тормыйбыз, мәш киләбез. Чакырган җирдән дә калмаска тырышабыз, "Айбагыр"дагы егет-кызлар да атлыгып торалар. Февраль аенда Чабаксарда узучы халыкара конкурска барырга да планлаштырабыз. "Сөембикә" татар халык ансамбле белән дә эшлим. Быел җәй Кырымга "Алтын мәйдан" фестиваленә дә җыенабыз әле. Алдан кычкырган күкенең башы авырта, диләр инде анысы. Алла боерса, барысы да яхшы булыр, дип өметләнәбез.

12 апрельдә Алабуга мәдәният йортында сольный концертымны бирергә дип йөрим. 45 яшьтә оештырырмын дип хыялланган идем, ул еллар кайгылы килде. Инде менә, санап утыргач, сәхнәгә беренче тапкыр менгәнемә дә 30 ел булган икән. Үзем дә шушы училищеда беренче курста укыганда җырлый башладым бит. Шушы уңайны да искә алырбыз сольный концертта. Шулай, көчебездән килгәнчә, тырышабыз. Артык мактана торганнардан түгел бит без, тыйнак халык.