Кайбыч районында “Кичке уен” уен-көлке белән узган

Кичке уеннар, элек-электән, иң матур йолаларның берсе булып саналган. Инде җиде ел рәттән уздырыла торган “Кичке уен” бәйрәме – дус-тату яшәүче кайбычлыларның иҗат осталыкларын, халык уеннарын тамашачыга тәкьдим итүе ул. Алай гына да түгел, бәйрәмдә Чүпрәле, Буа, Әтнә районнарыннан һәм Казаннан килгән сәнгать осталары, фольклор ансамбльләре дә катнашты.

“Бәйрәм Галия Кайбицкая музее яныннан башланып китте. Иң беренче булып, татарлар урам буйлап җырлап-биеп бардылар, аларны руслар каршы алды. Аннан соң, чувашлар һәм, соңгысы булып, керәшеннәр кушылды. Аннан соң, мәйданда уеннар башланды. Җыр-моң, бию, уен-көлке белән узган бу “Кичке уен”, чын мәгънәсендә, милләтләр бердәмлеге бәйрәменә әйләнде”, – дип хәбәр итте Соравылның клуб җитәкчесе Валентина Сурнаева.