Кремль яр буе урамында "Таба" фольклор музыка фестивале узды. Ул "ЭтноСтартапФорум" проектының йомгаклау өлеше буларак үтте. Форум яшь эшмәкәрләрнең Татарстан халыклары культурасын саклап калуга юнәлдерелгән проектларына ярдәм күрсәтү максатында оештырылган. Бу форум республикада беренче тапкыр узды. Аны Республиканың Яшьләр эшләре министрлыгы тормышка ашыра.

Проект кысаларында сәүдә нокталары эшләде. Аларда төрле милләт вәкилләренең үзенчәлекләрен күрсәтә торган товарлар сатып алу мөмкинлеге булдырылган иде. Сәхнәдә татар, чуаш, казах, мари коллективлары чыгыш ясады.

Татарстан Республикасының туган көнендә узган чарада "Керәшен чибяре" титулы иясе, яшь җырчы Татьяна Ефремова, "Бәрәкәт" керәшен яшьләре оешмасы җитәкчесе Алексей Дмитриев, "Бәрәкәт" активисты Роза Абросимова да катнашты. Татьяна Ефремова "Таба" сәхнәсендә ярты сәгатькә якын вакыт дәвамында тамашачыларга керәшен җыруларын ишеттерде, "Бәрәкәт"леләр халыкка сувенир продукциясен тәкъдим итте.

Фото: Бизнес-Онлайн, minmol_rt