Кызыл Тау авылыннан тарихи фото

— Ялгызым утырганда, гаилә альбомын актарырга яратам. Фотодан елмаеп карап торганнарның инде күбесе бу дөньядан мәңгелеккә күчкән. Бик күп истәлекләр искә төшә. Беренче фото 1986 елны Кыш озату бәйрәмендә төшелгән. Фотода – керәшен күлмәкләре кигән түтиләр, бөтенесе диярлек фермада эшли, авылыбыздагы «Тиңдәшләр» ансамбленә дә йөриләр. Ничек җитешкәннәрдер. Без, Миләтле Башы авылы халкы, Кыш озату бәйрәменә күрше авылга, Өскебашка бара идек. Яше-карты өчәр атка төялешә. Атларны кыңгыраулар тагып, матур итеп киендерәләр. Пар атлар җигеп барган чаклар да булды.

Түтиләр җырлыйлар, төрле бәйрәм йолаларын күрсәтәләр, дүрт авыл арасында ярыш гөрли. Ә мин коймак пешерәм. Минем бурыч, ел саен кунакларны кайнар коймак белән сыйлау. 

Табаларда чыжлап коймак пешә, самавырларда чәй кайнап утыра. Бәйрәмгә иртәнге якта, җир катырган вакытта барабыз, без кайтканчы җебетә, атлар чаналарын көчкә өстери. Сазга бата-чума җәяү тәпиләргә туры килгән чаклар да булды. Бик күңелле була иде бәйрәмнәр. Хәзер клуб эшләмәгәч, андый бәйрәмнәр юк. Ә менә Яңа елны, Нардуганны бергә җыелышып бәйрәм итәбез.