Керәшеннәрдә эзәр саклавыч ролен үтәгән

Ул төрле як керәшеннәрендә дә төрлечә атала. Ләкин, шулай да, күп җирдә ул — эзәр. Эзәрнең төрләре һәм кулланышы турында керәшен киемен тирәнтер өйрәнгән карендәшебез — Валентина Максимова сөйләде.

— Эзәрне ишеп, сугып, үреп эшләгәннәр. Техникасы бертөрле булмаган, чөнки төрле оста үзенчә эшләгән. Кешенең фантазиясеннән тора. Ягъни, һәр як үзенчә, үзенчәлекле итеп эшләгән.

Тышкы эзәр, гадәттә, сугылган булган. 10-12 сантиметр озынлыкта, билгә икешәр кат урап бәйләгәннәр.  Бик борынгы заманнарда ук, эзәрнең үзенең функциясе булган. Аны ешрак ир кешеләр кулланган. Ул аларга саклавыч ролен дә үтәгән. Керәшеннәрдә эзәрсез күлмәктән йөрмәгәннәр, чөнки ул гаеп саналган. Урамга да киенеп, эзәрен бәйләгәч кенә чыкканнар.

Эзәр һәрвакыт чукланган, чачакланып, аска таба асылынып калган. Аның да үз мәгънәсе булган. Кешене җир белән бәйләп, җирдән саклагыч алу өчен кулланылган. Гомумән, җир йөзендәге бар халык та элек җиргә ышанган, табигать белән бәйләнештә яшәгәннәр, аңа табынганнар, — дип аңлатты Валентина Максимова.

Валентина Максимова фотолары.