Зәй егетләре - Ватаныбыз сагында

Сарсаз-Баграж егете Александр Осипов хезмәтен Калуга өлкәсендә ракета гаскәрләрендә үтә. Александр кечкенәдән тәртипле, ярдәмчел булып үсә. Зәйдә татар гимназиясен тәмамлап, Зәй политехника көллиятендә электрик белгечлеген үзләштерә. Ул армия сафларына көзге чакырылышта алынган. 

— Улыбыз белән хәбәрләшеп торабыз. «Әти-әни, минем барысы да яхшы, борчылмагыз», дигән сүзләрне ишетү дә — безнең өчен зур сөенеч. Ул хезмәтеннән канәгать булуын әйтә, характеры да җитдиләнгән. Ил-көннәребез тыныч булсын иде дип телибез. Барлык әниләрнең дә уллары исән-сау әйләнеп кайтсын, — ди әти-әнисе Юрий белән Эльвира.

Артем Рябов — Сәвәләй авылы егете. Ул бүгенге көндә Севастопольдә Кара диңгез хәрби-диңгез флоты диңгез пехотасында хәрби бурычын үти. Егет туган авылы мәктәбендә белем алганнан соң, Яр Чаллыда Казан федераль университетының инженер-төзүчеләр факультетында һөнәри белгечлек үзләштерә. Узган язгы чакырылышта армия сафларына китә. 

— Армиядә хезмәт итү — һәр егет өчен зур тормыш мәктәбе ул. Әлбәттә, улыбызны сагынабыз. Аның Ватан алдындагы изге бурычын намуслы үтәве белән горурланабыз да. Бүгенге көндә илебезне саклаучы барлык егетләрнең туган якларга исән-имин әйләнеп кайтуларын көтәбез, — ди Артемның әнисе Людмила.

Ватанны саклау, халыкның азат һәм тыныч яшәешен тәэмин итү өчен армиядә хезмәт итү, тәвәкәллек һәм батырлык күрсәтү — һәр ир-егетнең бурычы. 

Зәй офыклары, Клара Ермолаева

Фотолар шәхси архивтан