Түбән Биштә чиркәү төзи башладылар

XX йөз башында, Түбән Биш авылында Казанский Изге Гурий чиркәве булган.

Үткән елның декабрь аенда халык җыелышып, авылда яңадан иман йорты – часовня булдыру турында сөйләшәләр. Әйткән сүзне үтәр өчен, аны оештыручы да кирәк. Бу хакта без, авылны иман йортлы итү өчен тырышып йөрүчеләрнең берсе, Виктор Кудряшов белән сөйләшеп алдык:

“Часовня төзергә дип тотынган эшебез, матур гына башланып китте һәм алдан уйлаганнан зуррак итеп нигез дә салып куйдык. Шуңа, часовня гына түгел, чиркәү булыр дип уйлаштык. Авылыбызның ак дәдәйләре,  чиркәү төзүдә башлап йөрүче Александр Анисимов, шулай ук,   Виктор Фролов, Николай һәм Григорий Кузнецовлар, Валентин Николаев һәм тагын берничә кеше әлеге эшне оештырып җибәрдек. Җиңел булмаса да, Ходай ярдәмен бирә, Александр Анисимов чиркәү урыны өчен җиргә рәсми рөхсәт алу максатына иреште. Урыны авылның элекке чиркәве янында ук булачак, Казанский Изге Гурий исемен йөртәчәк. Киләсе елның яз айларында эшне дәвам итәрбез дип өметләнәбез. Әлегә проектны рәсмиләштерү, төзелешкә рөхсәт алу кебек мәсьәләләрне хәл итеп йөрибез”, – диде.

Әлеге изге эштә авыл халкы бик теләп, актив рәвештә булыша, акчалата да ярдәм итә.

«Безнең өчен зур сөенеч. Дөньяларыбыз тыныч булып, чиркәү төзелеп, келәүләр үтсен, анда йөрерлек кешеләребез булсын иде!», – ди алар.

Лариса Кузнецова фотолары.