Мәләкәс авыл җирлегеннән Любовь Асылгәрәевага мактаулы диплом тапшырылды

Бүген «Татмедиа» бинасында компаниянең газета-журналларына язылуны актив рәвештә алга сөрүче хат ташучылар арасында конкурска йомгак ясалды.

"Почта хезмәткәрләренә сезнең фидакарь хезмәтегез өчен зур рәхмәт белдерәм. Сезнең эшегез бик мөһим - ансыз безнең эшчәнлекнең мәгънәсе югала. Бу һөнәргә тугры калган кешеләр тирән ихтирамга лаек. Хат ташучыларга лаеклы статусны кайтарырбыз дип ышанам«, - дип билгеләп үтте» Татмедиа " җитәкчесе Айдар Сәлимгәрәев.

 

Конкурс йомгаклары буенча иң яхшы хат ташучы исемен Тукай районының Мәләкәс авыл җирлегеннән Любовь Асылгәрәева алды, аңа мактаулы диплом тапшырылды.

Якташыбызны котлыйбыз! Аның эшендә Яхшы хатлар, җиңел газеталар һәм ярдәмчел кешеләр генә булсын.

Авыл халкы Любовьны  хөрмәт итә, газета-журналлар, хатлар алып килүен түземсезләнеп көтә. Любовь Николаевна — үз эшен җиренә җиткереп, авылдашларының җылы сүзен ишетеп эшләүче почта хезмәткәрләреннән берсе. Аның халыкка эчәр судай кирәкле хезмәтен күз алдына китерү өчен, бер эш көненә күз салыйк. Ул һәр көнне иртән, сәгать сигезгә почтага килеп, компьютерын кабыза, кеше җыелганчы, әзерлекне тәмамлый. Аннары, төрле хезмәтләр өчен түләү квитанциясе күтәреп, халык килә башлый, Любовь аларны кабул итә, заказлы хатларны ияләренә тапшыра. Газета-журналларны таратырга дип, олы сумкасына тутыра. Ә төштән соң, авыр сумкасын иңенә асып, авыл буйлап китә.

— Читенлекләре булса да, эшем бик ошый. Кеше белән аралашырга яратам. Почта таратып йөргән чакта авылдашларымның елмаеп каршы алулары, сөенүләре, хәл-әхвәл белешүләре күңелләрне күтәрә, йөрәккә май булып ята, — ди көннең беренче яртысында — җитәкче, икенче өлешендә хат ташучы булып эшләүче Любовь Асылгәрәева.