Һәр эштә бергә: Яңа Балыклыдан Ореховларның бәхет формуласы

Яңа Балыклы авылыннан гаилә башлыклары Ореховлар, төп гомуми белем бирү мәктәбендә эшлиләр, һәм үз үрнәкләрендә балаларга үз эшләренә җаваплы һәм битараф булмауның никадәр мөһим булуын күрсәтәләр. Олы кызлары инде олы тормышка мөһим адым ясаган – Туймазы юридик көллиятен тәмамлаган. 

«Аның максатчанлыгы һәм тырышлыгы – кечеләр өчен лаеклы үрнәк. Күптән түгел 7нче классны тәмамлаган Софья, әти-әнисенә һәм олы апасына шатланып булыша, игътибарлы һәм кайгыртучан булырга өйрәнә. Ә кечесе Демид, 2нче класс укучысы, олылардан калышмаска тырыша һәм барлык гаилә эшләренә горурлык белән катнаша.

Ореховлар гаиләсендә балалар тәрбияләүгә аерым игътибар бирелә. Монда кыйммәтләр турында сөйләп кенә калмыйлар – алар белән яшиләр. Бергә бакчада эшлиләр, хуҗалыкны карыйлар. Мондый уртак хезмәт хуҗалыкны алып барырга гына түгел, ә балаларны җаваплылыкка, үзара ярдәмгә һәм чит кеше хезмәтенә хөрмәткә өйрәтә», – дип сөйли директорның тәрбия эшләре буенча киңәшчесе Елена Кудряшова.

Ореховларда тормышларын бай һәм бәхетле итүче күп кенә яхшы гаилә традицияләре бар. Туган көннәрне һәрвакыт гаилә даирәсендә билгеләп үтәләр – бу җылы сүзләр, бүләкләр һәм ихлас кочаклашу вакыты. Гаиләдә керәшен бәйрәмнәренә аерым хөрмәт белән карыйлар, үз халкының гореф-гадәтләрен саклыйлар һәм буыннан-буынга тапшыралар. Олы көнгә әзерләнү – аерым йола: бергә куличлар пешерәләр, күкәйләр буйыйлар, өйне уңайлылык һәм якты бәйрәмне көтү хисе белән тутыралар.

«Җәй көне гаилә җиләк, чәчәк, үлән һәм гөмбә җыярга урманга йөрергә ярата.. Бу йөрүләр файда гына китереп калмый, ә кечкенә маҗараларга әверелә, анда һәркем үзе өчен яңа нәрсә ача ала. Ә урманнан соң – елгада коену,  су сибешү һәм тулы бәхет хисе була.

Ореховларның йорты һәм ишегалды һәрвакыт каралган, ә бакча рәсемнән төшкән кебек: якты чәчәкләр күзләрне сөендерә һәм бәйрәм атмосферасы тудыра. Монда бу йортка гаиләнең һәр кешесенең мәхәббәте һәм тырышлыгы салынганы сизелә.

Ореховлар гаиләсе – үзең белән, бер-берең белән һәм табигать белән гармониядә ничек яшәргә мөмкин булуының үрнәге. Аларның традицияләре, уртак хезмәтләре һәм бер-берсенә булган ихлас мәхәббәтләре аларны чын мәгънәсендә бәхетле гаилә итә», – дип хәбәр итте Ореховлар гаиләсе турындагы сүзен Елена Кудряшова.

Арина Орехова фотолары.