Җир җиләкле варенье

Тәмле варенье кайнату өчен, җиләк-җимешне түбәндәге күләмдә алабыз: 4 стакан җир җиләге, 1 яшел алма, 1 апельсин согы һәм кабыгының кыргыч аша чыгарылган сары өлеше (цедра), 4/3 стакан шикәр комы (песок), 2 аш калагы апельсин ликеры.

Эмаль табакта яфракчаларыннан чистартылган җиләкне салабыз. Алманың кабыгын әрчеп, үзәген алып ташлыйбыз да, артык эре булмаган кисәкләргә турыйбыз. Апельсин согы, цедрасы һәм песок өстәп болгатабыз.

Газ плитәсенә сүрән утка куеп, болгата-болгата, кайнатып чыгарабыз. Шикәр комы эреп бетеп, варенье куергач, плитәдән алабыз һәм апельсин ликеры салып, яхшылап болгатабыз. 5 минуттан соң стерильләштерелгән банкаларга салып, капкач ябабыз. Суынганчы бүлмәдә тотабыз. Соңыннан суыткычка алып куябыз.