«Сәяр» ансамбле – «Безнең заман» фестиваленең лауреаты

29 сентярбь Питрәч районының Ленино-Кокушкино авылы яшьләр үзәгендә "Наше время – Безнең заман" эшләүче яшьләрнең Х еллык ачык республика телевизион иҗат фестиваленең муниципаль этабы гала-концерты узган. Керәшен Сәрдәсеннән "Сәяр" халык ансамбле катнашып, бәйгенең шушы этабында 2 урынны алып, лауреат булганнар. 

"Фестивальдә катнашучыларның һәрберсе җиңүче. Сезгә алга таба да эшегездә дә, иҗатыгызда да уңышлар телим", – дип котлады район башлыгы Илһам Кашапов.

Фестивальдә районның төрле оешмаларында һәм төрле өлкәләрдә эшләүче яшьләр катнашты. Жюри членнарына "Музыка", "Бию", "Минута славы" номинацияләрендә 17 номер тәкъдим ителгән. "Наше время – Безнең заман"  башта районнарда үтсә, аның төп өлеше Казанда зур концерт белән тәмамлана. Шуңа күрә, район этапларында уңышлы чыгыш ясаучыларның 7 ноябрьдә "Пирамида" залында узачак гала-концертта катнашуы көтелә.

Фото: Керәшен Сәрдәсенең социаль челтәрендәге төркемнән алынды