Алексеевск ягы умартачысы Петр Кузнецов авылда яшәвеннән канәгать

Умартачы һөнәре аңа өченче буыннан килә.

– Бабай 32 ел умартачы булган, аннан – папама, ә 34 елдан соң, пападан миңа күчте. Умартачылык белән бик яратып, 18 еллап шөгыльләнәм. Балны сатып алучылар күп, бер тапкыр миннән алсалар, безнең даими алучыбызга әйләнәләр инде. Килеп тә алалар, заказ да бирәләр. Быел юкә балы әзрәк булыр, чөнки юкә яфракларына бөҗәк тиеп бетергән иде. Ә чәчәк, карабодай балының уңышы әйбәт булыр дип көтәбез. Балның бәясе төрлечә, өч литрлы банкадагы чәчәк балы – 1500-1800, юкәнеке – 2300- 2500 сум. Авылда яшәвебезгә бер дә үкенмибез. Хатыным Надежда белән ике бала үстерәбез. Барлык уңайлылыклары булган йортта, тормышның тәмен, ямен тоеп яшибез. Ялкауланмаска гына кирәк, яшәү шартларын тырышлык белән үзебез тудыручы, – дип сөйләде Петр.