Зәй керәшен егетләре якташларына гуманитар ярдәм илтеп кайткан

Валентин Атласов белән Иван егетләр янына дүрт мәртәбә барганнар. Бу хакта "Зәй хәбәрләре" сайты хәбәр итә.

«12 июньдә юлга чыгып киттек, егетләребез хезмәт итә торган Донецк, Запорожье, Херсон өлкәләрендә булдык. Хәрбиләргә элемтә чаралары, маскировка челтәрләре, коры аш һәм душ, окоп шәмнәре, машиналарга запас частьләр, тәгәрмәчләр алып бардык», — ди ул.

Хәрбиләр өчен иң ихтыяҗ булган әйберләрнең берсе маскировка челтәрләре икән. Ул — хәрби хәрәкәтләр зонасында кулланыла торган мөһим әйберләренең берсе. Шуңа бик куанганнар. Маскировка челтәрләре үрүче хатын-кызларга эшче куллар җитми, шул борчу өсти икән.

Хәрбиләр туганнарына, якыннарына, барлык зәйлеләргә сәлам җибәргәннәр. Гуманитар ярдәм җыюга өлеш керткән һәр кешегә, бу эшне оештыручыларга аерым рәхмәт әйтеп, «безне ташламыйлар», дип сөенгәннәр.

Егетләр бер-берсе өчен җанын бирергә әзер торалар. Тормыш кыйммәтләренә төшендерә торган җир бит ул. Күп сөйләшмичә генә, җиңеп кайтырбыз, Алла боерса, дип әйтеп калганнар.