Лениногорскида керәшеннәр культурасына багышланган чара узган

24 январь көнне шәhәрнең балалар китапханәсендә 11нче гимназиянең 5нче класс укучылары өчен керәшеннәрнең йола-гадәтләренә багышланган чара узды.

Оештыручылар, максат итеп, балаларны керәшен йолалары, җырулары, киемнәре, уеннары, милли ризыклары белән таныштыруны куйганнар. Чарага Федотовка авылыннан «Аланлык» үзешчән ансамбле дә килгән.

– Укучылар белән «Сукыр тәкә», «Йөзек салыш» уенннарын уйнадык, балаларны «Нардуган» бәйрәме күренеше белән таныштырдык, милли киемнәр турында сөйләдек, халык җыруларын башкардык. Үзебез белән шишәрә, пирмәнкә, пирәмәч пешереп алып килдек, балаларны сыйладык. Аларга бу кичә бик ошады, – дип сөйләде ансамбльдә җырлаучы Нина Фёдорова.