Ашыгыгыз! “Айбагыр” лагеренда ял итү өчен санаулы урыннар гына калган

“Айбагыр”этносменасы Яшел Үзән районында урнашкан “Мирас-Наследие” лагере базасында уза. Ул быел 12нче тапкыр 9-18 яшьлек балалар өчен үз ишекләрен ачачак. Этносменада барлыгы 78 бала ял итә алачак. Быел ул 23 июльдән 9 августка кадәр булачак.

“Мирас-Наследие” этнокультура лагеренда балаларның ялы өчен тиешле уңайлыклар тудырылган, заманча спорт мәйданчыгы, осталар шәһәрчеге, ашханә бар. Биредә балалар керәшеннәрнең тарихын һәм традициясен өйрәнәләр. Төрле конкурсларда, мастер-классларда һәм башка чараларда катнашалар. Экспортлар, танылган кешеләр белән очрашалар. Керәшеннәр тарихы, театр һәм башка тематик түгәрәкләрдә үз сәләтләрен үстерү мөмкинлеге дә бар.

Дәүләт биргән субсидия ярдәмендә, 18 көнлек бер путёвка бәясе – 16890 сум. Калган лагерьлар белән чагыштырганда бу күпкә арзанрак.

Быел лагерьда Татарстанның Тукай, Кукмара, Балык Бистәсе, Сарман, Биектау, Питрәч, Яшел Үзән, Саба, Мамамдыш районнарыннан һәм Казан, Яр Чаллы шәһәрләреннән, шулай ук, Киров өлкәсеннән дә балалар ял итәчәк, алар инде гаризалар биреп, үз урыннарын алганнар.

Балаларны өйрәтүче, караучы дәдәй, түтиләр үзләре дә шушы лагерьда тәрбияләнгән һәм "вожатыйлар мәктәбе" үтеп, сертификат алган актив керәшен яшьләре.

Кызыксындырган сораулар белән “Айбагыр” сменасы координаторы Юлия Дуваловага (тел.: +7 927 432-24-30) мөрәҗәгать итәргә кирәк. Онлайн-заявканы шушында басып, бирә аласыз.

Шулай ук, барлык мәгълүматны безнең сайттан да tuganaylar.ru карап бара аласыз.