Керәшен кызлары баш киеме: калпак-чачак, тәңкәле такыя

Кызлар, буй җитә башлагач, калпак кигәннәр; бәйрәмнәрдә калпак киеп, маңгайларына ука-чачак бәйләгәннәр. Кызлар калпагының трикотаждан һәм фабрика тукымасына чигеп эшләнгәннәре мәгълүм. 

Калпак-чачак

Калпак-чачак озын ак калпакка караганда озаграк кулланышта булган. Бүгенге көндә дә сандыкларда саклана, аннан алып киеп йөрерлекләре дә бар. Кара хәтфәдән яки башка төрле кара төстәге фабрика тукымасыннан чигеп эшләнгән калпак-чачаклар, бигрәк тә, Мишә буе керәшеннәрендә сакланып калган. Шулай ук, Мишә буе кызлары калпакларны үзбәк ефәгеннән дә тегәргә яратканнар. Беренче калпак-чачаклар тасмалар белән бизәлгән булса, соңрак алар тамбур чигүе белән бизәлгән. Калпаклардагы орнаментларда төрки халыкларга хас кояш, чәчәк мотивлары, тормыш агачы очрый.

Тәңкәле такыя

Керәшен кызлары кигән тагын бер баш киеме — такыя. Ул, белгәнебезчә, Мәлки керәшеннәрендә күбрәк сакланган. Такыя тоташ тәңкәләрдән генә тормаган, бизәгәндә мәрҗәннәр дә кулланылган. Кызганыч, бүген инде борынгы вариантлары юк дәрәҗәсендә. Сакланган фотоларда гына оригиналларны күреп була.

Фото: «Туганайлар»