Керәшен киеме элементларының атамалары: киҗе, кламбит,чоба

Сарпинка — төрле төстәге фабрика җитештергән мамык җепләрдән өйдә суккан тукыма.

Киҗе — мамыктан җегерләнгән җеп.

Әдрәс — Урта Азиядән кайтарылган ярым ефәк чуар тукыма.

Бикасаб — Урта Азиядән кайтартылган чуар киҗе тукыма.

Кламбит — «әдрәскә» охшатып өйдә суккан тукыма. Моның өчен җепләрне манар алдыннан, буяу үтмәслек итеп киләпләрне берничә җирдән кысып бәйләгәннәр.

Кырмазин, кармазин — кара кызыл (бордо) төстәге сукно.

Дарай — ефәк материя, парча, затлы тукыма.

Дарай җаулык — керәшен хатыннарының бәйрәмнәргә генә бөркәнә торган, үзеннән бизәк чыккан, чуклы ефәк яулык.

Шевнот — киҗе-мамык бәрхет (бархат).

Штуф (штоф) — ефәк тукыма.

Бишни — төсле җепләрдән шакмаклап сугылган киндер тукыма.

Камка — Кытай ефәге.

Кама — затлы мех (бобер).

Чүпләм — сугып төшерелгән бизәк.

Кырпу — киемнең, баш киеменең читенә тегелгән мех.

Китән — тупас киндер тукыма.

Әзәр, эзәр (пояс) — бизәкләп суккан яки үргән билбау.

Чыбылдык (полог) — кровать, сәке өстенә корыла торган (чебен-черкидән) махсус сугылган, тегелгән җайланма.

Чоба — өч, биш билле, озын җиңле бер генә катлы, өйдә суккан тукымадан тегелгән җиңел өс киеме.

Чикмән — туладан теккән өске кием.

Әрмәк — коран төсле, биле нык бөрелгән, туладан теккән кызлар өс киеме.

Инеч (подкладка) — күлмәкләрнең эчке ягының иңсә турына тегелеп куела торган икенче кат тукыма.

Кештәк (ластовица) — керәшен кием-салымнарының култык астына тегелгән аерым тукыма кисәге.

Киндер ыштыр (портянки) — аякны чорнау өчен махсус сугылган тукыма, оек урынына ялан аякка чорнаганнар.

Фото: Алиса Ахметшина