Бакалы керәшеннәре җыруы: «Солдатлар китәләр уйланып...»

Солдатлар (дай) китәләр, (ай), уйланып,
Билләренә каешлар бәйләнеп.
Исәннәр (дәй) йөрсәк (лә) без кайтырбыз
Туып-үскән илләргә әйләнеп.

Качтылар (да) тургайлар – күрдегезме,
Авылларга менеп (лә) җиткәнче.
Бер ходайның язганын без белмибез
Алдыбызга килеп (лә) җитмәенче.

Кара урманнарны (ла) чыккан чакта
Камчыларым калды (ла) каерылып.
Камчыларым өчен (лә) үкенмимен,
Туганнарым кала (ла) аерылып.