Югары Мәлемдә балалар Сабантуе узды

Сабантуйга бер көн кала мәдәният хезмәткәрләре “Шомбай” балалар театр түгәрәгенә йөрүчеләр белән бергә бүләкләр җыярга чыкты.

“Бүләк җыю үзе бер бәйрәм төсен алды. Авыл халкы балаларның күңелен күрергә тырышкан, барысы да аларның күңеленә хуш килә торган бүләкләр чыгарды. Моның өчен рәхмәтлебез аларга,” – ди мәдәният йортының сәнгать җитәкчесе Миләүшә Хәйруллина.

Мәйдан иртәдән үк балаларның шат авазларына күмелде. Кояш җылы нурлары белән күңелләргә бәйрәм кәефе өстәде.

Бәйрәм башында балаларга милли тәрбия бирү максатында, халкыбызның гореф-гадәтләрен белеп үссеннәр өчен башта аларны Сабантуй бәйрәме тарихы белән таныштырдылар. Балалар бик теләп халык уеннарында катнаштылар. Җиңүчеләр бүләкләргә ия булдылар.

“Өлкәннәр дә читтә калмады: әбиләребез яшь чакларын искә төшереп, көянтә-чиләк белән су ташу уенында ярыштылар. Балаларга кайсы чишмәдән су ташыганнарын сөйләп тә алдылар”, - ди Миләүшә Хәйруллина.

Алмаз Яхин бәйрәмне оештыручыларга музыкаль бизәлеш белән ярдәм итте. Балалар ул куйган көйләргә рәхәтләнеп биеде.

Югары Мәлемдә җәйнең беренче көне менә шулай балалар күңеленә гүзәллеге, яктылыгы белән кереп калды.

Фотолар авыл мәдәният йортыннан.

"Зәй офыклары"