Яңа Усы керәшеннәре Питрауны зурлап бәйрәм иттеләр

10 июль көнне Мөслим районының Яңа Усы авылында оештырылган Питрау җыены бу бәйрәмне яратучыларның барысын да үзенә җыйды.

Бәйрәм муниципаль район башкарма комитеты җитәкчесе Рафаэль Демидовның котлавы белән башланып китте.

Җәйләр керсә, гел алгысый күңел,

Гел үткәннәр искә төшәләр.

Усыларга ел да кайтыр идем,

Питрауларны бәйрәм итсәләр, – дип, алып баручы Ринас Әхмәтовның күңелләрне күтәрүе, мәйданда яңгыраган җырлар халыкны уен-ярышта катнашырга дәртләндерде.

Уңган-булганнар Питрау себеркесе бәйләп ярыштылар. Себерке белән “сугышу”га да теләп чыктылар. Күз бәйләп чүлмәк ваттылар. Егетләрнең иң җитезләре су ташуда катнашты. Усы Питравына гына хас булган кызыклы уеннардан да читтә калмадылар. Өс киемнәреннән “салават күпере”  салдылар. Мәйдандагы чирәмлеккә сибелгән бәрәңгеләрне тырма белән җыйдылар. Гаиләләрнең үзара ярышы булган эчлеккә печән атуда да сынатмадылар.