Олег Фазылҗанов: “Без дә шундый ук халык, безнең дә җаныбыз сезнеке кебек”

25 ноябрь көнне Яков Емельянов исемендәге мәдәни үзәктә үткән “Микулай” монодрамасына багышланган иҗат кичәсенең хейдлайнеры - Татарстанның атказанган артисты Олег Фазылҗанов булды. Артист Микулай роле аша җиткерергә теләгән сүзләре, хис-кичерешләре белән бүлеште.

“Микулай роле аша мин: “Керәшеннәр дә нәкъ башкалар кебек халык. Безнең бер ким җиребез дә юк. Безнең дә җаныбыз нәкъ сезнеке кебек. Диндә түгел, күңелдә, йөрәктә бит хикмәт”, – дип ачып бирәсем килде. Мин бу максатыма ирештем дип уйлыйм”, – диде актёр.

"Микулай" Олег Фазылҗановның иң яраткан образларының берсенә әверелгән. “Артистның уйнаган спектакльләре күп була. Һәрбер уйнаган ролем дә кадерле, дигән сүзләргә ышанып бетә алмыйм. Микулай образын минем тормышыма керде дә утырды. Мин аннан берничек тә аерыла алмадым”, – дип бүлеште актёр.