Агапова Лариса сүрәкә чигү осталыгы белән уртаклаша

Борыңгы кием стиленә хас "баш бәйләү" комплексы үзе генә дә берничә элементтан тора.
Мәләнчек "баш бәйләү" комплексының нигезе булса да, ул "баш бәйләү" комплексының икенче элементы сүрәкә белән тыгыз бәйләнгән. Сүрәкә өч өлештән тора: аның маңгайчасы, канатлары һәм койрыгы бар.
Мәләнчек белән сүрәкә бер-берсенең иярчене булып, хуҗасының "хатыннар" төркеменә караганлыгын күрсәтеп торган.
Әлеге видеоязмада Сәвәләй авылы кызы Агапова Лариса Викторовна керәшеннәрнең асыл бизәге булган сүрәкә чигү осталыгы белән уртаклаша. Сүрәкә чигү Лариса Викторовна гаиләсендә буыннан - буынга тапшырылып килә торган күркәм гадәт.