Николай Александров: «Кайда йөрсәм дә, күңелдә син – Керәшен Сәрдәсе»
Питрәч районының Керәшен Сәрдәсе авылының җирле шагыйре Николай Александров шигырьләре.
Күңел түрендә – Сәрдәм.
Иң гүзәл авыл син, Сәрдәм:
Бар дөнья ямен җыйган.
Галәмдәй киң күңелеңә
Ничаклы сөю сыйган.
Куш.:Алсу таңга ачып куя
Һәр тәрәзәң пәрдәсен.
. Кайда йөрсәм дә, күңелдә
. Син – Керәшен Сәрдәсе.
.
Һәр балаңа кадерле син,
Сиңа – газиз һәр балаң.
Күңел теләп, сиңа кайтам -
Җаннарыма ямь алам.
. Куш.:шул ук
Ир-егетләр – яу батыры,
Эштә дә тиңнәр булмас.
Кызларың – сылу, чибәрләр, -
Күңел яратып туймас.
Куш.: шул ук.
Инешләрең йөгерек сулы,
Сихри моңлы һәр чишмәң;
Җаныма яктылык иңә
Чишмәгә серем чишсәм.
Куш.: шул ук.
Болыннарда чалгы моңы,
Тургай җырында – кырлар;
Таңнар аткач, сандугачлар
Сәрдәне мактап җырлар.
Куш.: шул ук.
Рәхмәт сезгә, авылдашлар
Чакырдыгыз, очып кайттым,
Авылдашлар, рәхмәт сезгә:
Күңелемә бәхет иңде,
Шатлык нуры – күзгә, йөзгә!
Зал тутырып җыелгансыз,
Авылдашлар, рәхмәт сезгә!
Хис-тойгыга тулды җиһан,
Җан сусаган сихри сүзгә.
"Чулпы” җырлый җаннар биләп,
Таныш моңнар үзәк өзә:
Күпме сагыш, күпме аһәң, -
Мескен йөрәк ничек түзә!?
Миннән бүләк – шигъри юллар,
Шигырьләрдә – рәхмәт хисе,
Сихри мизгел бүләк итте,
Бүген безгә Сәрдә киче.
Шигыремдә – бала чагым,
Монда үткән яшьлек елы,
Татлы, якты, назлы алар,-
Хатирәләр шуңа җылы.
Бу мизгелләр гомергә тиң,
Бу мизгелдә – хөрмәт хисе;
Искә төшеп, җаннар назлар
Кабатланмас Сәрдә киче.
Чакырдыгыз,авылдашлар,
Теләп кайттым, рәхмәт сезгә!
Тагын шундый очрашулар
Бүләк итсен язмыш безгә!
Табигатьтән ничек көнләшмисең
“Учись у них…" А. Фет
Бу көзләрдән ничек көнләшмисең,
Ничек сокланмыйсың көзләргә:
Хушлашканда туган сагышын да
Төрә бит ул нурлы төсләргә!
Ә кышларда күпме аклык, сафлык,
Күпме көч һәм гайрәт буранда!
Яшик әле без кышларга охшап,
Күңел кылы сыкрап торганда.
Ә язларның сихри гүзәллеген
Учлап-учлап җанга саласы!
Безнең язмышларга, язлар кебек,
Сүнәсе дә кабат янасы!
Баш әйләнә, йөрәк ярсып тибә:
Сихри язга җәйләр ялгана –
Күпме аһәң, күпме җете төсләр,
Хисләреңә ал да сал гына!
Шигырьләр Николай Александровның шәхси архивыннан алынды.
.
Следите за самым важным и интересным в Telegram-каналеТатмедиа
Керәшен дөньясындагы яңалыкларны ВКонтакте, Телеграм-каналда карап барыгыз.
Хәбәрләрегезне 89172509795 номерына "Ватсап" аша языгыз.
Подробнее: http://tuganaylar.ru/news/novosti/aybagyru-byt
Подробнее: http://tuganaylar.ru/news/novosti/aybagyru-bytсоциаль челтәрләрендәге группалардан укып, белеп барыгыз.
Нет комментариев