Владимир Кашаев «Өлкәннәр аралашу үзәгендә» күңелләрне күтәрде

Әлеге үзәкләр бөтен ил буйлап пенсионерларның ял вакытын уңайлы шартларда уздыру мөмкинлеге тудыру максатында булдырыла. Анда өлкән буын кешеләренә күңел теләгән юнәлештә шөгыльләр белән мавыгуына ирешү, аларның тормыш ритмын хуплау күздә тотыла. Биредә пенсионерлар кызыклы кешеләр белән очрашуларга йөри, финанс һәм компьютер белемен арттыра һәм дусларча аралаша алачак.

Сәвәләй мәдәният йортының талантлы аккомпаниаторы, моңлы җырчы Владимир Кашаев «Өлкәннәр аралашу үзәгендә» кунакта булып, үзенең иҗаты белән җыелган халыкны сөендерде.

«Рәхәтләнеп биш җыр җырладым, тыпырдатып биеттем кызларны!», – дип шатлыгын уртаклашты Владимир Мартиянович.

Аның матур, йөрәккә үтеп керерлек моңлы җырлары өлкәннәрнең күңеленә хуш килгән, аларны биергә дә дәртләндергән. Бу очрашу һәркем өчен дә онытылмас мизгелләргә, күтәренке кәефкә күмелде.

Фото Ләйлә Сабаевадан.