Шуранлылар СВОдагыларга һәрьяклы ярдәм күрсәтә

Авыл җирлеге Керәшен Шуранын, Татар Шуранын һәм Приют Шуранны берләштерә. Хәзерге вакытта өч егетләре хәрби операциядә Ватан кушкан бурычны үти. Аларга һәм хәрби операциядәге барлык ир-егетләргә авыл халкы бердәм булып ярдәм итә. 

Әле соңгы араларда гына алар коры душлар ясап, волонтёрлар аша СВО зонасына озатканнар. Керәшен Шураны авыл җирлеге башкарма комитеты җитәкчесе урынбасары Гөлнур Софина әйтүенчә, авыл халкы шушы җирлек килене, Мөслимдә яшәүче Гөлнара Минһаҗова аша, волонтёрлар белән даими элемтәдә тора.

СВОгдагыларга ярдәм итүдә Галина Софина, Әнисә Хәбирова һәм, шулай ук, керәшен киленнәре — Фираза Петрова, Рушания Виноградова, Зәйтүнә Яковлева, Земфира Феклина аеруча зур тырышлык күрсәтәләр. Алар коры душлар, чәй үләннәре ясап, кыр шартларындагы хәрбиләргә көнкүреш кирәк-ярагы җыеп озаталар. Җирлек халкы, үз мөмкинлегеннән чыгып, акчалата да ярдәм итә.