Сәвәләй авылы мәдәният йортында ретро-фотосурәтләр күргәзмәсе ачылды

Фотосурәтләр – ул безнең иң кадерле истәлекләребез, үткәнебез белән бүгенгебез арасындагы күпер. Сәвәләй авылы халкының бу күргәзмәсе дә шушы максаттан ясалган.

“Бу күргәзмә, чыннан да, авылның үткәненә бер сәяхәт кебек булды. Күптән онытылган йөзләр, элеккеге заманнарның көнкүреше, балачактан ук таныш булган урамнар – болар барысы да бер урында тупланып, һәркемне үзенең тамырларына, туган ягына тагын да ныграк бәйләде. Фотосурәтләрдәге һәр кеше, һәр мизгел – ул авылның үзенчәлекле тарихының бер бите. Алар аша без үткән буыннарның хезмәтләрен, шатлыкларын, кайгыларын, тормыш юлларын күрәбез. Бу истәлекләрне саклап, киләчәк буыннарга тапшыру – безнең бурычыбыз. Күргәзмәдә катнашучыларның күбесе үзләренең яшьлек елларын, әти-әниләрен, бабай-әбиләрен танып, күңелләрендә җылы хисләр уяттылар. Бу очрашу, чыннан да, авыл халкы өчен зур бәйрәмгә әверелде, бер-берсе белән аралашу, истәлекләр уртаклашу өчен менә дигән мөмкинлек тудырды”, – дип сөйләде Сәвәләй авылы клубы җитәкчесе Ләйлә Сабаева.

Мондый чаралар авылның рухи тормышын баета, кешеләрне берләштерә һәм туган җиргә булган мәхәббәтне арттыра.

Ләйлә Сабаева фотолары.