Сарсаз-Баграж авылы егете Александр Осипов ракета гаскәрләрендә хәрби хезмәттә

Һәр ир-егетнең үз Ватаны алдында изге һәм мактаулы бурычы бар. Ул — армия сафларында хезмәт итү. Туган ягында калган әти-әниеңне, якыннарыңны, дусларыңны һәм тагын бик күпләрнең тыныч йокысын, шат тормышын саклаудан да изге, мактаулы эш бармы соң?! Менә шундый батыр, кыю ир-егетләр арасында районыбызның да күп егетләре бүгенге көндә Россиянең төрле почмакларында хәрби хезмәтен үти. Зәй районыннан Сарсаз-Баграж авылы егете Александр Осипов та алар рәтендә. 

Александр  кечкенәдән тәртипле, ярдәмчел булып үсә. Зәйдә татар гимназиясен тәмамлап, Зәй политехника көллиятендә электрик белгечлеген үзләштерә. Ул армия сафларына көзге чакырылышта алынган. Хезмәтен Калуга өлкәсендә ракета гаскәрләрендә үтә.

«Улыбыз белән хәбәрләшеп торабыз. «Әни, минем барысы да яхшы, борчылмагыз», дигән сүзләрне ишетү дә — безнең өчен зур сөенеч. Ул хезмәтеннән канәгать булуын әйтә,  характеры да җитдиләнгән. Ил-көннәребез тыныч булсын иде дип телим. Барлык әниләрнең дә уллары исән-сау әйләнеп кайтсын», — ди әнисе Эльвира белән әтисе Юрий.

Фото гаилә архивыннан.

Заинск-информ