Питрәчтән Елена Дормидонтовага мактаулы исем бирелде

«Ак Барс» кошчылык комплексы»ның 3 нче бүлеге бройлер цехы кош үрчетүчесе Елена Дормидонтовага мактаулы исем бирелде. Бүләкне аңа Татарстан Республикасы Рәисе Рөстәм Миңнеханов республика Авыл хуҗалыгы министрлыгы коллегиясенең утырышында тапшырды.

Елена Ивановна кош үрчетүгә дистә еллар гомерен багышлаган – ул бу тармакта 1995 елдан бирле эшли. Аның һөнәри юлы сиксәненче елларда инкубатор операторы вазифасыннан башланган, ә соңгы 15 елда ул кош караучы булып эшли.

Кошлар белән эшләү, автоматлаштыру шартларында да, даими игътибар таләп итә. Елена Ивановна контролендә – меңләгән баш кош, аларны ашату, сәламәтлеге һәм бинадагы микроклимат.

«Без кошларны 38-40 көнгә кадәр күзәтәбез. Сменада кош караучы һәм слесарь белән икәү эшлибез: температураны, дымлылыкны күзәтәбез, үлгән кошларны җыябыз, күчерү эшен башкарабыз», – дип сөйли ул эш көннәре турында.

Яшь чагында Елена Ивановна шәһәргә китеп караган, әмма күңеле һәрвакыт кире тарткан – туган якларга һәм яраткан эшенә.

«Кошлар белән эшләү ошый, бу кызыклы», – дип таный ул.

Аның бик күп Мактау грамоталары, әмма бу бүләк беренче медаль булганга, аеруча кадерле. Ире Иван да күп еллар предприятиедә слесарь булып эшләгән. Алар бергә ике кыз – Татьяна һәм Лиананы тәрбияләгәннәр, һәм оныкларын үстерергә булышалар. Буш вакытында Елена Ивановна бакчада рәхәтләнеп казына һәм чәчәкләр үстерә. Дормидонтовлар Питрәчтә, үз йортларында яшиләр, ә эшкә хезмәткәрләрне көн саен автобус алып бара.

Пестрецы-информ