Мөслимдә Халыклар бердәмлеге елына багышланган зур бәйрәм узды

Бу кичәдә районның күпмилләтлелеген, төрле халыкларның дуслыгын һәм бердәмлеген күрсәттеләр. Чарада район мәгариф идарәсе башлыгы Лилия Хәбибуллина, Халыклар дуслыгы йортының район вәкиллеге җитәкчесе Рушат Солтанов, җирле керәшен оешмасы җитәкчесе Галина Романова катнашты. Алар үз чыгышларында халыклар дуслыгының мөһимлеген ассызыкладылар һәм төрле милләт яшьләрен бер-берсенә хөрмәт белән карарга өндәделәр.

Кичәдә барлыгы 11 милләтнең мәдәнияте тәкъдим ителде. Һәр милләт үзенең йола-гадәтләрен, милли киемнәрен, җырларын һәм биюләрен күрсәтте.

«Халыкка, аеруча, Ренат Рифович 6"б" классы укучыларының һәм аларның әти-әниләре, әбиләре белән бергәләп,  керәшен мәдәнияте белән таныштырулары бик ошады. Алар керәшен халык ашларын тәкъдим иттеләр, кунакларны милли ризыклар белән сыйладылар. Шулай ук, керәшен җыруларын башкарып, Олы көн йоласын сәхнәләштереп, тамашачыларны сокландырдылар», – дип язды Галина Романова.

Алар тамашачыларның мәхәббәтен яулап, 1000 сумлык сертификат алдылар.

Бу чара Мөслим районында яшәүче төрле милләт халыкларының бердәмлеген, дуслыгын һәм үзара хөрмәтен тагын бер кат раслады. Ул киләчәк буыннар өчен дә яхшы үрнәк булып торачак.

Фото: Галина Романова