Мәлкәнлеләр маскировка челтәрләре үрү өчен тукыма кисә башладылар

Мәлкән авылы клубы җитәкчесе Светлана Упаева  һәрвакыт изге эшләрдә актив катнашучы, ярдәм кулын сузарга әзер торучы уңган хатын-кызларга зур рәхмәт белдерә. Аларның тырышлыгы белән бу эш тизрәк башкарылачак.

«Мәлкән авылы халкы илләрдә иминлек, дөньяда тынычлык урнашуын, һәр гаилә бәхет-шатлыкта гына яшәвен тели. Бүгеннәрдә авыл халкы тагын махсус хәрби операциядә катнашучы егетләргә ярдәм итү өчен берләште. Алар маскировка челтәрләре үрү өчен тукыма кисә башладылар. Бу изге гамәл, һичшиксез, егетләребезгә көч-куәт бирер, аларның рухын күтәрер. Безнең бердәм булуыбыз, егетләребезнең туган якларына исән-сау әйләнеп кайтуларына өмет уята. Һәр киселгән тукыма кисәге, һәр бәйләнгән төен – ул безнең егетләргә булган ихлас мәхәббәтебез, аларның тормышларын саклап калу теләгебез», – ди Светлана Упаева.

Бу эшкә кушылучы һәр кеше, яшь-карты димичә, үз өлешен кертә. Балалар да әби-бабаларына булышып, тукымаларны кисәргә өйрәнә, аларның йөрәкләрендә Ватанга мәхәббәт, яклаучыларыбызга карата хөрмәт хисе тәрбияләнә.

Светлана Упаева фотолары