Людмила Белоусова «Татарстан» телеканалында керәшеннәр турында сөйләде

 – Бүгенге көндә республика төбәк керәшен иҗтимагый оешмасы нинди эшләр башкара?

– Безнең оешманы Татарстан халыклары ассамблеясе оешмалары арасында ветеран оешма дип әйтергә була, 2027 елда безгә 20 ел тула. Шул еллар эчендә эшләнгән эшләр бик зур. Күптән түгел Питрау бәйрәмнәре узды. Ул республикадагы төрле авылларда, районнарда атна буе барды. Керәшеннәрнең бәйрәмнәре табигать календарена бәйле: Рождество, Тройсын, Покрау.

Яшьләр, балалар белән күп эшлибез. Керәшен балалары өчен булган «Айбагыр» лагереның 15 еллыгын билгеләп үттек. Ул – Питраудан соң уза торган зур чараларның берсе. Анда этник юнәлешкә акцент ясала. Кырда үсеп утырган айбагырларга игътибар итсәгез, алар башларын яктылыкка бора, аның орлыклары да күп. Ул – үсү дигәнне аңлата. Шуңа да оешманың символикасы итеп айбагырны сайладык.

– Халыклар бердәмлеге елы сезнең эштә чагылыш табамы?

– Татарстан халыклары ассамблеясендә торабыз, республикадагы бөтен чараларда катнашабыз. Безнең Я.Емельянов исемендәге мәдәни үзәк республика оешмасының ресурс үзәге булып тора. Без анда милли киемнәр күргәзмәсе ачтык, «Батырлык. Горурлык. Дан» фотокүргәзмәсе дә эшләде.

Татарстанның төрле районнарында 26 бүлегебез бар. Һәр бүлек районда  зур эш алып бара. 

Питрауда фольклор коллективларга Татарстан Рәисе фондыннан милли киемнәр тегәргә сертификат бирәләр. Бу элгәреге киемнәрне заманча яңарту мөмкинлеге бирә.