Керәшен Сәрдәсендә «Үзебезнекеләрне ташламыйбыз» ярдәм штабы оештырылды

Питрәч районының Керәшен Сәрдәсе авылы мәдәният йортында  «Үзебезнекеләрне ташламыйбыз» акциясе девизы астында чын ярдәм штабы оештырылды. Авыл халкы көн саен җыелып, тукыма кисәкләреннән штурмовиклар өчен маскировка челтәрләре әзерлиләр.

«Маскировка челтәрләре — хәрбиләр өчен иң кирәкле әйбер, алар техниканы һәм солдатларның үзләрен яшереп калырга ярдәм итә.
Озак саклана торган азык-төлек, дарулар, җылы киемнәр һәм җылы сүзләр язылган хатлар тутырылган тартмалар нәкъ менә мәдәният йорты фойесында җыела. Авыл хатын-кызлары җон эшкәртеп, үз куллары белән сугышчылар өчен оекбашлар бәйләделәр. Бу тыныч, җаваплы эш егетләрне салкын окопларда теләсә нинди заманча технологияләрдән дә яхшырак җылыта. Тыл – күренмәс фронт, анда һәр үрелгән сетка, һәр бәйләнгән оекбаш һәм һәр ярдәм егетләр өчен броня булып тора», – дип сөйләде мәдәният йорты җитәкчесе Айдар Маннапов.