Керәшен Сәрдәсе музеенда Казан шәһәреннән килгән туристларны каршы алдылар

1 апрель көнне, Туган якны өйрәнү музееның Керәшен Сәрдәсе авылы филиалында Казан шәһәреннән килгән кунак-туристларны зурлап каршы алдылар. Бу көнне авыл халкы үзенең гореф-гадәтләрен, мәдәниятен күрсәтергә әзерләнгән иде.

«Кунакларны "Чулпы" керәшен халык фольклор ансамбле үзенең моңлы кунак җыруы белән каршы алды. Җыр-моң аша алар Казан кунакларына керәшеннәрнең кунакчыллыгын, җан җылысын җиткерделәр. Аннары ансамбль җырчылары "Йөзек салу" су аша юрау йоласының бер өлешен күрсәтеп, борынгы традицияләрнең матурлыгын ачтылар», – дип сөйләде мәдәният йорты җитәкчесе Айдар Маннапов.

Казаннан килгән туристлар керәшеннәрнең бай мәдәниятенә чумып, күңелле һәм файдалы вакыт үткәрделәр. Мондый очрашулар төрле халыклар арасында дуслыкны ныгыта, мәдәни алмашуга ярдәм итә.

А. Маннапов фотолары