Казан федераль университеты һәм «ТНВ» махсус программа әзерли

«Татар-информ»да уздырылган матбугат конференциясендә Казан федераль университетының филология һәм мәдәниятара багланышлар институты директоры Радиф Җамалетдинов шул хакта сөйләде.

«Татарстан-яңа гасыр» телеканалы, безнең студентлар белән бергәләп, махсус программа әзерләргә җыена», — дип әйтте ул. Институт директоры сөйләвенчә, бу эшнең нәтиҗәләрен инде яңа уку елы башында ук күрергә булачак.

Радиф Җамалетдинов, шулай ук, соңгы елларда үз институтларының милли медиа өчен кадрлар әзерләү мәсьәләсендә «Татмедиа» акционерлык җәмгыяте белән дә актив хезмәттәшлек итүен телгә алды. Телевидениедә, радиода эшләү өчен аерым бер махсус программа кирәк булуын да искәртте. «Безнең телевидение өчен кадрлар әзерләүгә дә керешелер дип ышанам», — диде ул.

Хәзерге вакытта әзер проектлар юк, әмма төрле вариантлар бар инде. Ул программаны гамәлгә куя башлаганда, «өстәмә белем» программасын да тормышка ашырырга мөмкиннәр. 

«Ягъни, махсус комиссия сутдентлар арасыннан сәләтлеләрне сайлап алып, шулар белән тиешле эш оештырылачак. Әлбәттә, практикага да берникадәр сәгать биреләчәк. Практиканы ТНВда һәм ГТРКда үтәчәкләр», — дип тә әйтте әле ул. 

Сүз уңаеннан, бүген вузларга студентлар кабул итү кампаниясе башланды. Быел Казан федераль университетының филология һәм мәдәниятара багланышлар институты I курска 1,3 мең студент кабул итәчәк.