Карендәшләребез Әлмәттә «Этника вакыты» форумында катнаштылар

Анда Татарстанның балалар сәнгать мәктәпләре, музыка мәктәпләре, иҗат коллективлары җитәкчеләре һәм укытучылары, мәдәният-ял итү учреждениеләре белгечләре катнашты. 60-тан артык катнашучы арасында карендәшебез Зәй районының Түбән Биш мәдәният йорты директоры Наталья Нужная да бар иде.

Форумда бик күп сәнгать эшлеклеләре, җитәкчеләр чыгыш ясаган. Чыгыш ясаучылар арасында күренекле карендәшебез, этномузыколог, Татарстанның атказанган сәнгать эшлеклесе  Геннадий Макаров та булган.

Очрашуда музыкаль мирасны саклау буенча конкрет адымнар каралган: милли уен коралларын торгызу, архив материаллары белән эшләү, укытучылар өчен уку-методик кулланмалар әзерләү һәм яшьләрне халык мәдәниятен өйрәнүгә җәлеп итү.

«Форум кунаклары төрки музыкаль кораллары күргәзмәсен карады, ә практик секцияләрдә Сергей Вертелецкийдан аларны ясау процессы белән таныштылар. «Карлыгач», «Ак Лачын», «Хыял», «Тургай» һәм «Турумтай» балалар коллективларының курай, думбыра, дәф һәм башка традицион коралларда оста уйнауларын тыңладылар. Форум югары дәрәҗәдә оештырылган. Үзебез өчен бик күп кирәкле мәгълъмат алдык», – диде Наталья Нужная.

Наталья Нужная фотолары.