Яңа Мәлкән авыл китапханәсендә патриотик сәгать узган

Китапханәчеләр, әлеге чараны оештырып, яшь буынга Ватанны саклауның мөһимлеген, хәрби хезмәтнең изге бурыч булуын аңлатырга омтылганнар.

«Укучылар солдатларыбызның көндәлек тормышыннан мисаллар китереп, аларның рухи ныклыгын, батырлыгын һәм фидакарьлеген ассызыкладылар. Чара ахырында катнашучылар «Сугыш беркайчан да булмасын» дигән девиз белән сугыш турындагы әдәбият, альбомнар һәм папкалар белән таныштылар. Бу өлеш сугышның аянычлы нәтиҗәләрен күрсәтеп, тынычлыкның кадерен аңларга ярдәм итте. Китапханәдә тәкъдим ителгән материаллар сугышның кешелеккә китергән газапларын, югалтуларын һәм фаҗигаләрен чагылдырды. Әлеге патриотик сәгать  якташларыбызның батырлыгын мәңгеләштерүгә һәм киләчәк буыннарда патриотик рухны ныгытуга юнәлтелгән мөһим чара булды», – дип хәбәр итте Яңа Мәлкәннән Зөлфия Равилова.

Фото: З. Равилова.