Егетләребез сынатмый. Кайбычтан Никита Русов БДИда максималь балл җыйган

Никита ике катлаулы фәнне — химия һәм биологияне — уңышлы үзләштереп, һәрберсеннән максималь 100 балл җыйды. Бу гади уңыш кына түгел, ә зур тырышлык, максатчанлык һәм фәнгә булган чын мәхәббәт нәтиҗәсе. Бу җиңү артында дәреслекләр белән үткәргән йокысыз төннәр, йөзләгән чишелгән мәсьәләләр, катлаулы темаларны үзләштерү һәм зур сабырлык ята.

Күптән түгел Никита «Мин табиб булачакмын» дип исемләнгән яшь уйлап табучыларның төбәкара олимпиадасы призеры булды. Анда ул «Медицинада цифрлы технологияләр» номинациясендә үз проектын тәкъдим итте һәм сәламәтлекне шәхси мониторинглауның имплантацияләнә торган системасын уңышлы яклады.

Никитаның әти-әнисе әйтүенчә, бу уңыш — укучыларына ышанган һәм белем биргән укытучыларның ярдәме, шулай ук гаиләсенең кайгыртуы һәм терәге нәтиҗәсе. Никита мәктәпнең һәм районның горурлыгы.

«Улыбызның уңышларына сөенәбез. Хәзер Никита алдында барлык юллар ачык: иң яхшы югары уку йортлары, төрле юнәлешләр, зур мөмкинлекләр. Без аның батырлык белән алга баруын һәм яңа биеклекләргә ирешүен телибез», – диләр Никитаның әти-әнисе.

Фото: Марина Русова.