Дуваловларның бакчасы – Мамадышның чәчәкле бизәге

Гөлфинур һәм Николай Дуваловларның тырышлыгы һәм матурлык яратуы аркасында, аларның бакчасы һәм ишегалды төрле-төрле гөлләр белән тулып, ерактан ук күзне җәлеп итә. Бу матурлык бер көндә барлыкка килмәгән. Дуваловлар чәчәкләр үстерү белән 27 елдан артык шөгыльләнәләр, һәм бу еллар эчендә алар төрле конкурсларда катнашып, һәрвакыт призлы урыннар яулап киләләр.

«Николай чәчәкләрне миңа караганда да ныграк яратадыр», – ди Гөлфинур Дувалова. – «Җәй буе аларга су сибеп, туфракларын йомшартып, карыйбыз, үстерәбез. Барлык төр чәчәкләрне үстереп карадык. Аларны тәрәзәләргә, балконга урнаштырдык, хәтта өй эчен дә бизәдек. Бигрәк тә розалар безнең яраткан чәчәкләребез».

Дуваловлар гаиләсе 50 елдан артык бергә гомер кичерә. Икесе дә лаеклы ялда, ике ул үстергәннәр, хәзер инде дүрт оныклары бар. Гөлфинур апа — иҗат кешесе дә. Ул дүрт авылның тарихына багышланган китаплар язган: «Чишмәләр иле син, Мамадыш», «Ана бөек исем», «Онытмыйбыз! Хәтерлибез! Горурланабыз!». Шулай ук, ул хикәяләр һәм шигырьләр дә иҗат итә, алар да китаплар булып басылган.

Дуваловларның йорты – ул чәчәкләр генә түгел, ә тормышның матурлыгы, гаилә җылысы һәм иҗади рухның берләшү урыны. Аларның бакчасы – ул Мамадышның чәчәкле бизәге, һәркемгә илһам бирүче матурлык үрнәге.

Фотолар; Мамадыш-информ