Борды авылында укучылар каникулларын файдалы уздыра: маскировка челтәрләре үрүгә кушылалар

Тукай районының Борды авылында яшәүче укучылар каникул вакытларын бик файдалы һәм мәгънәле итеп уздыралар. Алар, ял итү урынына, илебезгә кирәкле булган маскировка челтәрләре үрү эшенә кушылганнар. Бу игелекле эшне авылның актив кешеләре, мәктәп укытучылары һәм ата-аналар оештырган. Һәр көнне, волонтерлар белән бергә җыелып, балалар да челтәрләр үрә. Бу эшне башкару өчен кирәкле барлык материаллар да әзерләнгән.

«Укучылар, үз куллары белән ясаган әйберләренең нинди зур ярдәм булуын аңлап, бик теләп катнашалар. Алар өчен бу – бер яктан, туган илгә хезмәт итү мөмкинлеге, икенче яктан, бергәләшеп эшләү, дуслыкны ныгыту һәм яңа күнекмәләр үзләштерү өчен яхшы мөмкинлек», – дип сөйләде мәдәният йорты җитәкчесе Нурия Рамазанова.

Бу акция авылда яшәүчеләрнең бердәмлеген, патриотик рухын күрсәтә. Балаларның мондый эчкерсез һәм фидакарь хезмәте һәркемне сокландыра.

Нурия Рамазанова фотосы.