Владимир авылы уңганнары кәсилә тегә - видео

Ул – хатын кызлар, бигрәк тә олыгая башлагач, бер як җилкә өстеннән киеп куя торган тәңкәле саклавыч тасма. Хатын-кыз кияүгә чыккач бала таба, бала имезә, шуңа, мондый саклавыч бигрәк тә кирәк дип саналган. Ул аны күз тиюдән, начар энергиядән саклаган.

Мамадыш районының Владимир авылында хатын-кызлар кәсилә тегеп карарга булганнар.  Баштарак алар этник киемнәр тегү остасы Валентина Максимовага мөрәҗәгать итеп, аның кәсилә тегеп бирүен үтенгәннәр.

“Безнең дә кәсилә киясе килә. Тегеп бирегез әле, диделәр. Ә мин аларга кәсилә тегү бик кыйммәткә чыгуын аңлаттым. Үзегез тырышып карагыз әле дидем”,– дип сөйләде Валентина Петровна.

Ә озак та үтми, Владимирның уңганнары аңа үз эшләрен видеога төшереп тә җибәргәннәр.

“Эшләренә карап шаккаттым, бигрәк дәртләнеп киткәннәр, эшләгән саен остарабыз, диләр. “Күз курка, кул эшли” дигәндәй, эшкә тотынасы гына, эшләнә ул!”, – дип сүзен тәмамлады Валентина Максимова.