Тәңкә авылы чиркәве

Мәгълүматләр буенча чиркәү 1811-1822 елларда төзелә. Аны төзүчеләр кирпечен узләре сугып, шул кирпечләрдән салганнар. Измәсен күкәй сарысы кушып ясаганнар дип сөйлиләр.

Чиркәү «Церьков Петра и Павла», «Петроравловский церьков» дип аталган. Чиркәүнең свещеннигы, диакон, үзенең җыюучылары булган. Чиркәүнең чаңы һәм аны кагучы үз остасы да булган. Чаң авазы, тирә як авылларга ишетелеп, халыкны иман йортына чакырып торган. Ул заманда кеше чирләп китсә дә, үлсә дә, иң беренче чиркәүгә килеп, поп белән сөйләшеп, ярдәм сораганнар. 

100 елдан артык халыкка хезмәт иткән иман йорты туза башлый, чиркәүгә кеше дә әз йөри башлый. 1939 елда авыл советы җыелышында чиркәүне ябарга дигән карар чыгарыла. 

– Безнең балачак шул чиркәү янында уйнап үтте. Чиркәү эчендәге тар гына баскычтан менгәч бер булмә һәм шул бүлмәдә бик зур тәреләр, тәре куйган приставкалар бар иде. Алтарь урыны таштан булып, кызылга буялган. Иконаларны чиркәүле авылларга алып киттеләр. Чиркәүдә башта колхоз сепаратын тоттылар. Склад итеп ашлык та салдылар. Аннары ашлама тутырдылар. Шулай итеп, чиркәү ташландык хәлгә калдырылды, — дип искә ала авыл халкы.