Семен Фёдоров: «Халыкны берләштерү, Татарстанны үстерү максатыннан...»

— Республика керәшен оешмасы эшеннән мин бик канәгать. Менә ничә ел инде бу оешмабызның идарә члены булып торам. Балалар өчен үткәрелә торган чаралар да, өлкәннәр өчен була торган бәйгеләр дә, гаиләләр өчен уздырыла торганнары да — төрле юнәлештә булсалар да — барысы да халыкны берләштерү, Татарстанны үстерү максатыннан оештырыла. Шунысы шатландыра. Төбәкара бәйләнешне генә алсак та, безнең керәшеннәр Башкортстанда бар икән, без алар белән дә элемтәдә. Чиләбедә бар икән кан кардәшләребез — алар белән дә ныклы элемтә булдырылган. 

Теләче районының Колбагыш авылы керәшене буларак, «Туганайлар» газетасын үзем дә алдыртам, туганнарга да яздыртам. Газета керәшеннәр тормышын төрле яклап яктырта. Махсус хәрби операциядәге егетләр турында да язасыз. 

Әле күптән түгел генә патриотик тәрбия буенча координацион совет утырышына булган идем, анда да махсус хәрби операцияне күбрәк яктырту кирәклеге турында сүз барды. Театрларның репертуарында да патриотик темадагы әсәрләрне күбрәк кертү, вакытлы матбугатта да моңа аерым игътибар бирергә кирәклеге әйтелде. 

Монда никадәр генә тыныч, ничек кенә рәхәттә яшәсәк тә, анда бит сугыш дәвам итә, шуңа күрә андагы егетләребезне онытмаска, алар турында күбрәк язарга кирәк.