Керәшен егете Яков самбода — беренче

Җиңү бәйрәменә багышлап, Нурлатта уздырылган бу ярышта барлыгы 250 яшь спортчы — 2009-2013 елгы үсмерләр көч сынашты. Ярышка үзебезнең Татарстан белән беррәттән, Ульяновск һәм Самара өлкәләреннән дә килгәннәр иде.

Самбо буенча бу традицион ярышта катнашкан 2012-2013 елгы балалар арасында (50 килограмм авырлык үлчәвендә) Яков Юзеев җиңүгә лаек булды.

Казаннан Яковның бабасы, отставкадагы капитан Яков Иванович безгә шалтыратып, әлеге шатлыклары белән уртаклашты. Яков бабасы белән оныгы Яковның исемнәре бер үк булуга аптырамагыз, Владимир авылы керәшене (Мамадыш районы), көрәшче Яков заманында үз әтисе Иван исемен улы Иванга кушкан булган. Үз чиратында, олы улы тугач, Иван да аңа үз әтисе исемен биргән. Шулай итеп, бабайлы-оныклы Юзеевларның икесе дә Яков исемен йөртә. Оныгы Яковны 9 яшеннән көрәш секциясендә шөгыльләнә.