Яңа төбәкләргә эшкә китәчәк медицина хезмәткәрләренә бер тапкыр бирелә торган түләүләр ике тапкырга арттырылачак

«Авыл табибы» һәм «Авыл фельдшеры» программаларын гамәлгә ашырабыз, әлеге программалар кысаларында медицина хезмәткәрләренә бер мәртәбә түләүләр бирелә. Дәүләт башлыгы кушуы буенча Россиянең яңа төбәкләренә эшкә китүчеләр өчен бу түләүне арттырачакбыз: табиблар өчен ике миллион сумга, фельдшерлар, шәфкать туташлары һәм башка урта буын медицина белгечләре өчен бер миллион сумга кадәр», - диде ул.

Хөкүмәт башлыгы билгеләп үткәнчә, бу максатларга федераль бюджеттан миллиард сумнан артык акча бүлеп бирү каралган, шуның 350 миллионнан артыгы быелга.

Моннан тыш, әлеге ике программаны тагын бер механизм белән тулыландырачаклар, аның ярдәмендә хезмәткәр килешү гамәлдә булган вакытта бер тапкыр эш урынын алыштыра һәм шул ук төбәкнең башка сәламәтлек саклау оешмасына күчә алачак, дип өстәде Мишустин. Элек түләүләрне алу өчен килешү буенча биш ел эшләргә кирәк иде.

«Әлеге карарлар медицина хезмәткәрләренә кечкенә торак пунктларда калырга яхшы стимул булыр, дип өметләнәбез. Шулай ук медицина көллиятләре һәм югары уку йортларын тәмамлаучылар өчен туган җиргә кайтырга, анда эшләргә, квалификацияле ярдәм күрсәтергә, җирле халыкка консультацияләр бирергә. Бу бик мөһим», - дип ассызыклады премьер.

Ул шулай ук тиешле карарны имзалады.

«Авыл табибы» федераль программасы 2012 елның 1 гыйнварыннан гамәлдә. Аның кысаларында авылга эшләргә кайтырга әзер булган 50 яшькә кадәрге һәр табибка бер миллион сум күләмендә түләү бирелә.

Татар-информ